Close

25. Februar 2019

Beroopsweddbewarv in de Beroopsschool Wittmund

De 7. Februar 2019 stunn heel unner de Teken van de Beroopsweddbewarv in de Buurkeree. Dat Landvolk as Utrichter harr to de Veranstalten in de Beroopsschool Wittmund nöögt.
All Scholwichte un Scholjungse van dat Agrarrebett kwemen tosamen, um sük in verscheden Berieken mitnanner to meten. Leden ut de Kuntreien van dat Landvolk Wittmund harren as Richters alls in d‘ Oog.

De Scholwichte un Scholjungse mussen verscheden Upgaven nakomen:
Fragen ut ‘t Allgemeenweten un Fackweten mussen se swart up witt beantwoorden. Butendeem mussen se hör Bedriev in en Präsentation vörstellen un achteran en mündlichen Prüfung överstahn.
De Fackdeel, de denn kweem, bestunn ut twee Upgaven. In de Warkstee van de Beroopsschool Wittmund mussen se na en Teken en Flessenöffner torechtmaken. Daarbi mussen se bohren, fielen, sagen un Gewinden snieden. Bi de Upgaav harren de Scholwichte un Scholjungse en Tied vörgeven, un hör wurr düchtig wat ofverlangt.

Tolest mussen de Scholwichte un Scholjungse dör Kieken un Ruken bestimmen, wat för Saadereen in Schalen utstellt wassen un verscheden Holtsoorten toörnen.

Na de Utweerten wurren de dree Besten ut elke Fackstuuf mit fein Priesen uttekent. De dree Besten van all Deelnehmers sünd wiedermellt un mutten sük nu bi de tokomend Regionalentscheed mit anner Schoolwinners/kes meten.

De Landvolkpräsident, Vertreders ut de Politik un Wirtschaft un twee Vertreders van de Landjugend sünd de Nögen van dat Landvolk Wittmund nakomen un weren heel andaan van de motiveerte Scholwichte un Scholjungse un de good Ofloop van de Weddbewarv. Na de Begrötens dör de stellvertretende Schoolbaas Dirk Lammers, hebben de Gasten noch en Gang dör de School maakt, bi de de Plattdüütskbeupdraggte Herbert Fuhs hör up Platt wat over de elkelt Warksteeofdelen van Beroopschool Wittmund vertellt hett.

De Richters un de Mesters wassen heel düchtig tofree mit dat, wat de Scholwichte un Scholjungse leist hebben.

Wi bedanken uns, dat dat all so fein lopen is.

Bericht: Herbert Fuhs