Close

28. November 2019

In d‘ Holt mit de Schölers van de Beroopsschool Wittmund

Verleden Week hebbt de Schölerskes un Schölers ut de Buurkeree en Nögen van dat Landesamt för Forstwirtschaft kregen. Nicole Janssen van de Naturschutzhoff hett to ‘t Begröten en lecker Fröhstück maakt. De Schölers hebbt düchtig mithulpen un hebbt sük van hör beste Sied wesen. Na dat Uptanken mit lecker Koffje un Broodwark harr de tostännig Förster de eerste Pläseer för hör. In sien Wald mussen oll Bomen wieken. Daarto weer en Harvester bestellt worden.

 

En Harvester is en över 500.000,00 € düür Maschin, de Bomen bit to en Dörmeter van 70 cm mit twee Krallen anpacken un fasthollen deit un daarna mit en 80 cm lang Kettensaag ofsaagt. Wenn de Boom liggt, deit he hum glieks meten, de Qualität word faststellt, de Östen offrääst un de heel Boom word up en in d‘ Computer instellt Längenmaat in Stücken sneden.

De Schölers hebbt vööl Informationen kregen. So hett de Hydrauliktank van de Maschin över 400 Liter Öl bi sük. Dat Öl is avers ungefährlich för de Wald, wiel dat en besünner Öl is, dat biologisch ofboot worden kann.

De Schölers hebbt de Nachhaltigkeit van de Forstwirtschaft kennenlehrt. Dat Holt van de Bomen word för Möbels, Paletten of as Brannholt bruukt. Daar word alltied blot so vööl ofhaalt, as ok nawassen deit.

Daarto gifft dat in de Holt ok Renaturierungsmaßnahmen. In eenig Berieken word weer vööl vernässt. So as dat fröher ok al alltied west hett. De Wald word sük sülvst överlaten.

De Schölers weren heel neeisgierig un hebbt vööl Fragen stellt. So wullen se to ´n Bispööl weten, of dat hier ok Borkenkäfer geven deit un wo de utsehn. Daarto wullen se natürelk ok weten, wat de all so vernelen doont.

En wunnerbaar Dag, för de sük mit düchtig Applaus för de Förster un för Froo Janssen bedankt wurr.

Text: Herbert Fuhs