Utteken van de eerst „Plattdüütske Beroopsschool“ in Oostfreesland

De Beroopsschool för de Landkreis Wittmund düürt sük nu offiziell „Plattdüütske Beroopsschool“ nöhmen.

De Kultusminister Grant Hendrik Tonne hett de Utteken an de Schoolboverste van de BBS Wittmund Christine Steinröder un de Plattdüütskbeupdraggte Herbert Fuhs övergeven.
De BBS Wittmund hett en fein Schriftstück kregen un butendeem en Uttekenplakette för hör School.
Se is de eerst BBS in Oostfreesland un lanneswied – buten de BBS Wildeshusen – de bither eenzige Beroopsschool, de disse Titel för ´t Insetten van Platt in all Rebetten kriggt.
Tonne hett in sien Dankesproot de vööl Aktivitäten nöhmt.

De Beroopsschool Wittmund hett de Pleeg van de plattdüütske Spraak in hör Leitbild verankert.
Immersive Spraakkoppels worden in vööl verscheden Berieken insett, umdat vööl Mesterskes un Mesters Platt proten of snacken köönt.
All Jahr gifft dat Weddbewarven, waar de Schölerskes un Schölers hör Plattdüütskkenntnissen utproberen köönt.
Daarbi düren Opa un Opa geern Stöön geven.

För plattdüütskinteresseerde Mesterskes un Mesters worden Snupperkursen anboden.
In vööl Beropen van ´t Handwark höört Plattdüütsk eenfach daarto.
Supermarkten un in de leste Tied ok Tanksteden doont hör Waren toeerst up Plattdüütsk utteken. Gastronomiebedrieven beden hör Ettereen un Drinkereen immer mehr ok up Plattdüütsk an.
In de Buurkeree is Plattdüütsk de Olldagsspraak.
Butendeem is de plattdüütsk Spraak heel good in de Pleeg bi Lüü, de unner Demenz lieden, intosetten.
Wiel de Nafraag so groot is, deit de BBS Wittmund en Plattdüütsk-AG för Schölerskes un Schölers ut verscheden Landen un verscheden Beropen anbeden.