An Middeweek, de 18.September, is in de Beroopsschool in Wittmund de Broschüre „Platt in de Pleeg“ vörstellt worden. Daarto hett de Plattdüütskberader van ´t Landesschoolamt, Herbert Fuhs, Mesterskes un Mesters ut de Kuntreien van Oostfreesland un de Naberscholen van ‘t Eemsland un Freesland na de BBS Wittmund nöögt. Över 60 Lüü sünd d‘r komen.

Dirk Lammers, Baas van de BBS Wittmund, hett de Begröten övernohmen.  To Begünn hett de Mesterske Maria Budrich mit hör Pleegklass en kört Szeen ut en Pleeginrichten vörspöölt. Twee Schölerskes hebben oll Froolüü spöölt, de sük nich mehr sülvst helpen könen un nu in en Pleegbedriev unnerkomen sünd. As de een van en Pleegswester up Hoogdüütsk anproot word, reageert se heel düll un will nich doon, wat se sall. Denn kummt en tweede Pleegswester daarto un proot hör up Plattdüütsk an un up ‘nmaal is se heel anners drup, freit sük un reageert frünnelk.

Mit disse lüttje Theaterspööl hebben de Mesterkes un Mesters, un daarto ok vööl Schölerskes un Schölers ut de Pleegschool, futt sehn kunnt, wo good de platttdüütske Spraak, besünners in hör Beroop, ankomen deit.
Mit de grote Unnerstütten van dat Plattdüütskbüro van de Oostfreeske Landskupp mit de Mitarbeiderskes Anita Willers un Ilse Gerdes un hör Baas Bernd Grünefeld, is de Broschüre „Platt in de Pleeg“ in Oostfresenplatt översett worden.
In de Broschüre sünd eenfache Bispölen uplist, wo de Pleger sük mit de Betruffene unnerhollen kann. Butendeem sünd vööl Vokabels ut de Pleegbedriev upföhrt.

Bispööl:
Bauchschmerzen = Buukpien
Geht es ihnen nicht gut? – Sünd se slecht tofree?

Disse Broschüre kann so tomaal insett worden un gifft de Pleegbedrieven en Bült Stöön. De Broschüren könen umsünst bi Herbert Fuhs bestellt worden.
Hella Einemann-Gräbert van de Pleegschool ut Wildeshusen (Autorin van de Broschüre) hett de Schölers heet maakt: In de Wittmunder Kuntrei weer de Vörutsetten, Plattdüütsk in de Plegg intoföhren, allerbest. Se weer düchtig andaan van de heel Plattdüütskproters un Snackers.

För de grote Unnerstütten sünd Anita Willers, Ilse Gerdes un Hella Einemann-Gräbert mit sülvst maakt Marmelaad un lecker friske Krinthstuut bedankt worden.
De Press, de mit dree verscheden Zeitungen vertreden weer, hett vööl schrieven un sük över Interviewgevers nich besweren kunnt.

Malte Stickel, de Baas van de Pleegofdelen van de BBS Wittmund, hett en heel wichtigen Satz seggt: „Wi sünd in en grote Verantwoorden tegenöver disse Spraak, wiel de hier so good in all Beropen vertreden is.“